قصيدة ام سجين بامريكا

أصيح بأعلى الصوت نايف فقدنــاك عساك تسمع صرختي يوم أناديــك
أنا أمك اللي عيدها يوم لقيــــــــاك يا سعد نفسي لو عيوني تلاقيـــــك

والقلب ناره تشتعل عقب فرقـــــاك ما تطفي النيران يا كود أياديــــــك

لبست ثوب الحزن بعدك ولا أنسـاك والنوم ودع يوم غابت لياليــــــــك

تاهت بي الخطوات ودروبي أشـواك والدمع من عيني على الخد يبكيـك

أراجع الماضي وأعيد ذكـــــــــــراك تشدني الذكرى وأبكي لماضيـــــــك

سجين بالغربة ويا كبر بــــــــــلواك الله يعينك دايم في بلاويــــــــــــــك

هذا القدر مكتوب ، مكتوب ما جــاك اصبر عسى الله بالنهاية ينجيــــــك

بديار بوش سجنك الموحش هنـــاك يا ليت لي قدره على الدرب واجيـك

يا سجن أرفق مسندي وسط مبنــاك ما شاف شمس ومظلمات مبانيــــك

مدري يا عمري كيف الأحوال وياك طمني عنك طمن أمك تحاتيـــــــــك

من يغسل هدومك ومن قام يرعــاك ومن يطبخ الوجبات منهو يواسـيك

ومنهو الذي بالليل لا نمت غـــطاك خوفي عليك البرد بالحيل يوذيــــــك

ودي قبل موتي مشاهد محيـــــــاك ودي أضمك في يديني وحاكيــــــــك

يا حافر قبري دخيلك رجينـــــــــاك تحط فوق النصب نيشان بوصيـــــك

يمكن يحين الوقت ترجع لمربـــــاك وتزور قبري مسرع في خطاويــــك

يا سيدي سلطان تكفى طلبنـــــــاك ياراعي الفزعات تشكر مساعيـــــك

شلال طيب منبعه دوم يمنــــــــــاك خيرك مغطي كل بيت باراضيــــــــك

وقت الشدايد ما لها غير شــــرواك يبشر بعزه كل من جاك ناصيــــــــك

ياسيدي سلطان حنا فدايــــــــــــاك بارواحنا نفديك نفديك نفديـــــــــــك

الجود وأنت الجود يمشي بممشــاك يمشي وراك ويتبعك ما يجاريـــــــك

يتعبني مدحك لو أعدد سجايـــــــاك والشعر يرفع رايته ما يوفيـــــــــــك

يالله عسى المولى يصونك ويرعاك ويعود نايف يا عسى الله يخليـــــــك

أبختصرها يا ذرى كل من جــــــاك شكوى تجيلك تنتهي ما تعديــــــــــك